በየዕለቱ ከእግዚአብሔር ቃል ጋር፦ በዓመት አንድ ጊዜ ሙሉውን መጽሐፍ ቅዱስ ለመጨረስ የሚያስችል መርሃ ግብር
“የእግዚአብሔር ሰው ፍጹምና ለበጎ ሥራ ሁሉ የተዘጋጀ ይሆን ዘንድ፥ የእግዚአብሔር መንፈስ ያለበት መጽሐፍ ሁሉ ለትምህርትና ለተግሣጽ ልብንም ለማቅናት በጽድቅም ላለው ምክር ደግሞ ይጠቅማል” (2ጢሞቴዎስ 3፡17)። የእስራኤልን ሕዝብ እየመራ ከግብጽ ባርነት ነጻ እንዲያወጣቸው እግዚአብሔር የሾመው ሙሴ ከሞተ በኋላ እግዚአብሔር ኢያሱ በቀጣይነት እንዲመራ ሲያሰማራው የሰጠው መመሪያ በቃሉ እንዲተጋና ይህ ሲሆን በሁሉ እንደሚከናወለለት ገልጾለት ነበር፦ “የዚህ ሕግ መጽሐፍ ከአፍህ አይለይ፥ ነገር ግን የተጻፈበትን ሁሉ ትጠብቅና ታደርግ ዘንድ በቀንም በለሊትም አስበው፤ የዚያን ጊዜም መንገድህ ይቀናልሃል ይከናወንልሃልም” (ኢያሱ 1፡8)።

ስለዚህ ቤተ ክርስቲያናችን ለእግዚአብሔር ቃል (መጽሐፍ ቅዱስ) ልዩ ትኩረት ትሰጣለች። ሰው በሕይወቱ ለማደግና የእግዚአብሔርን ሃሳብ ተረድቶ ለማገልገል እንዲሁም በኑሮው የሚነሱትን ተግዳሮቶች ለመቋቋም በጸሎት እየተጋ ቃሉን በየዕለቱ ሊመገብ ይገባል፣ መጽሐፍ ቅዱስን በትጋት ማንበብ አለበት ብላ ታምናለች።

ለዚህ አንዲያግዝ መጽሐፍ ቅዱስን በየዕለቱ በማንበብ በዓመት አንድ ጊዜ ለመጨረስ የሚያስችል መርሃ ግብር አዘጋጅታ ተግባራዊ በማድረግ ላይ ትገኛለች። በየዕለቱ የሚነበበው የመጽሐፍ ቅዱስ ክፍል (መጽሐፉና ምዕራፎቹ) ተለይተው ተቀምጠዋል።